الرئيس السيسي للمتعدين على الزراعات: “أي تعدي هنشيله وهندفعك تمن شيله”
أكد الرئيس عبد الفتاح السيسي، أنه سيتم وقف كل الدعم المقدم للحكومة من خبز أو دعم تمويني أو غيره لمن يخالف أو يتعدى على الأراضي الزراعية أو الترع والمصارف، مضيفًا: “أي تعد هنشيله وهندفعك ثمن شيله، إحنا بنتكلم عن دولة بتحترم نفسها وتحترم شعبها”.
وأضاف السيسي في افتتاح محطة معالجة مياه بحر البقر: “إحنا كدولة بنحاول نسابق الزمن لتطوير واستعادة كفاءة منشآتنا بالكامل، زي ما شوفتوا الترع وحالها، كان بيأثر على حال الناس، ومتقدرش تستفيد بالمية، الدولة بتقوم بدور، والمواطن عليه دور.
وأكمل السيسي: لو انتوا النهاردة كحكومة لو راجعتوا الإجراءات اللي اتعملت في الـ 7 سنين، هتلاقوا إن التخطيط كان لغاية 2052، وقطعنا خطوات كبيرة عشان كنا متأخرين، بعض المواطنين تعدوا على منشآت الحكومة، لما تتكلم إن فرع رشيد بيعدي 30 مليون متر مكعب من المية، بعد ما كانوا 80 مليون، مش هنقبل كحكومة بده، كل التعدي بتاعة المنشآت والحكومة، وزارة الداخلية والقوات المسلحة، آخد تمام عشان نشيل، إحنا مش هنتحايل على حد، بعد 6 شهور أخد تمام، كل التعديات تتشال وأخد تمام خلال 6 شهور، زي ما أنا بعمل تطبين للترع وإجراءات فوق الخيال، اللي بيتعمل في مصر فوق الخيال”.
وتابع: “مش هقبل بالتعدي، عايز تغتصب أرض الدولة وأسكت، ده كلام مش مقبول دلوقتي، كان زمان مقبول، حد يقولك انت زعلان، لأ، أنا خايف عليكم، ليه بنعمل كده في نفسنا، معلش يا دكتور محمد، – يقصد وزير الري الدكتور محمد عبدالعاطي- ومحدش يزعل مني، انتوا كنتوا بتعملوا إيه، لا لا، 6 شهور وألاقي الجسور متظبطة زي الكتاب ما بيقول، وتتحط المعدات، وترجع زي ما كانت، لو محتاج تنزل القوات يا محمد نزل، يقصد الفريق محمد زكي، وزير الدفاع- سواء تعدي على الأراضي الزراعية أو غيره، وبالمناسبة وقف كل الدعم لأي حد متعدي على الأراضي الزراعية أو الترع والمصارف”.
وأردف: “لازم نحافظ على اللي عندنا؛ لأنه مش كتير عشان نضيعه، قدامنا شهور قليلة، ويكون المطلوب في المرحلة الثانية نقل المياه إلى الأراضي المستهدف زراعتها.. بنتكلم في حدود 500 ألف فدان”.
وأكمل: “بنقول للمواطن اللي عايز يزرع، تعالَ اشتغل، مش هنكلفك أي حاجة تانية.. الفدان بيتكلف 300 ألف جنيه عشان يبقى قابل للزراعة، تكلفة الأرض وشبكة المياه والكهرباء والطرق، أو تسوية الأرض، الموضوع على بعضه بالحسابات والحرص الشديد بنقول 300 ألف جنيه لكل فدان، مين كان من المواطنين ينفق ده عشان يجيب 15 ألف جنيه، لو اتحطوا في البنك كانوا جابوا 30 ألفًا”.
واستطرد الرئيس: طب ليه الدولة بتتصدى؟ عشان تشجع وتطور.. هل الشركات جاهزة تيجي؟ أي مشروع بنعمله نتمنى القطاع الخاص والمستثمرين ييجوا يشتغلوا، مافيش حاجة بتتعمل هنا نُص نُص، يتبقى بعد ما نعمل كل ده أن نوفر كل حاجة للناس والخدمات المطلوبة، سواء الناس دي من أهالي سيناء أو من بره سيناء.